Uyu munsi tariki 1 Ukwakira 2024, mu Gihugu hose hatangijwe ibikorwa by’ukwezi k’Ubumwe n’Ubudaheranwa. Ku rwego rw’Igihugu, byabereye mu Karere ka Ruhango mu Murenge wa Ntongwe.

Mu ijambo yagejeje ku bitabiriye icyo gikorwa, Umuyobozi Nshingwabikorwa ushinzwe Ubumwe bw'Abanyarwanda n'Ubudaheranwa, Kayumba Uwera Alice, yibukije ko mu mateka y’Abanyarwanda indangagaciro na kirazira byabaye ishingiro ry’ubumwe bwabo, abasaba gusubiza amaso inyuma bakareba ibyafashaga Abanyarwanda kudatatira igihango cy’ubunyarwanda, bagakomeza kubyubakiraho no muri iki gihe.

Ubushakashatsi bugaragaza ko igipimo cy’ubumwe n’ubwiyunge mu Banyarwanda cyagiye kizamuka, aho muri 2010 cyari kuri 82.3%, muri 2015 kigera kuri 92.5%, naho muri 2020 tugera kuri 94.7%. 

Ubushakashatsi bwakozwe na MINUBUMWE muri 2023 bugaragaraza kandi ko Abanyarwanda bageze ku gipimo gishimishije cy’ubudarehanwa aho ubudaheranwa ku muntu ku giti cye bugeze kuri 75% mu gihe ku rwego rw’inzego buri ku kigero cya 92%. 

Kayumba Alice yagaragaje ko nubwo igipimo cy’ubumwe n’ubudaheranwa bw’Abanyarwanda kiri ku rwego rwo hejuru, hakiri imbogamizi Abanyarwanda basabwa guhangana na zo nta kwirara, zirimo ingengabitekerezo ya jenoside; amatsinda yubakiye ku kwironda, inyigisho z’amacakubiri zitangirwa ku ishyiga; amwe mu madini n’amatorero bigira inyigisho ziyobya; amakimbirane ashingiye ku mutungo n'ibindi. 

Yasabye Abanyarwanda bose by’umwihariko urubyiruko kuzitabira ibikorwa byiganjemo ibiganiro biteganyijwe muri uku Kwezi, kubigiramo uruhare no gufatira hamwe ingamba zo guhangana n’icyakongera gucamo Abanyarwanda ibice aho cyaturuka hose.

Intego z’uku Kwezi k’Ubumwe n’Ubudaheranwa ni ukurebera hamwe intambwe imaze guterwa mu rugendo rw’ubumwe n’ubudaheranwa bw’Abanyarwanda aho batuye, aho bakorera, no mu muryango mugari (Ibyagezweho n’inzitizi); gusobanukirwa uruhare rw’umuco nyarwanda, indangagaciro na kirazira mu kugira imyumvire, imitekerereze, imyitwarire n’imikorere ihamye ndetse no gufata ingamba zo gukumira no gukemura ibibazo bikigaragara bibangamiye ubumwe n’ubudaheranwa mu muryango nyarwanda.

Ukwezi k’Ubumwe n’Ubudaheranwa muri uyu mwaka wa 2024 kuje mu gihe dutangiye gahunda y’iterambere y’imyaka itanu ya Guverinoma (NST2). Ni umwanya mwiza wo kwisuzuma no gufata ingamba zo gukomeza kwimakaza amahitamo y’Abanyarwanda yo KUBA UMWE no gushyira imbere ibibahuza bibafasha kwihuta mu iterambere.