Uyu munsi ku wa 25 Mutarama 2024, MINUBUMWE yamuritse imirongo ngenderwaho (guidelines) mu bikorwa by'isanamitima no kunoza imikorere n'imikoranire mu rugendo rwo kubaka ubumwe n'ubudaheranwa bw'Abanyarwanda.

Atangiza inama yamurikiwemo iyo mirongo ngenderwaho, Umuyobozi Nshingwabikorwa ushinzwe ubumwe bw'Abanyarwanda n'ubudaheranwa, Uwacu Julienne yavuze ko gushyiraho imirongo ngenderwaho bigamije kumva kimwe imiterere, uburemere n'uburyo bukomatanyije bukwiye gukoreshwa mu gukemura ibibazo biremereye umuryango nyarwanda.
Yagaragaje ko iyi mirongo ngenderwaho idakuraho umwihariko n'uburyo buri mufatanyabikorwa asanzwe akoresha, ahubwo yerekana iby'ingenzi bidakwiye kubura mu buryo ubwo ari bwo bwose bwakoreshwa, bityo tukaba twizeye ko aho umufatanyabikorwa afasha Abanyarwanda mu buryo bufatika.

Iyi mirongo ngenderwaho izafasha buri mufatanyabikorwa gukora mu buryo buzana impinduka, bufasha Abanyarwanda gukira ibikomere nk'imwe mu nzitizi zibangamiye ubumwe n'ubudaheranwa kuko iyo umuntu ahungabanye, adatekanye, adashobora kubana neza n'abandi cyangwa ngo yiteze imbere.
Kugira ngo ubumwe n'ubudaheranwa bukomeze gutera imbere, ni ngombwa guhuza imbaraga no kongera ingufu muri gahunda z'isanamitima n'inyigisho zigamije guhindura imyumvire biganisha ku mibereho n'imibanire myiza y'Abanyarwnada, bigakorwa mu byiciro byose by'Abanyarwanda.

Asoza iyi nama, Umunyamabanga Uhoraho Mahoro Eric yasabye buri mufatanyabikorwa gufata iya mbere mu gukurikiza iyi mirongo ngenderwaho, abizeza ubufatanye bwa MINUBUMWE mu rugendo rwo kubaka Ubumwe n'Ubudaheranwa bw'Abanyarwanda.